Қирғизистондаги барча мактаблар 16 декабрдан карантинга олинади, ўқувчилар онлайн ўқитиш шаклига ўтадилар. Бу ҳақда Жогорку Кенеш йиғилишида таълим ва фан вазирининг ўринбосари Тўқтобубу Ашимбаева маълум қилди.
Депутат Мурат Мараталиевнинг болалар ўртасида ЎРВи ва грипп билан касалланиш ҳолатининг кўпайгани бўйича кўтарган масаласига амалдор шундай жавоб берган.
«Қирғизистондаги барча мактаблар [карантин учун] ёпилиши керак. Уйда икки фарзандимиз мактабга боради, иккаласи ҳам касал. Энди ҳамма мактабга боради ва бир-бирини юқтиради. Эпидемиологлар билан гаплашинг, улар ҳамма тузалиб кетиши учун барча мактабларни бир ёки икки ҳафтага ёпишни тавсия қилишлари мумкин. Ва энди сиз 10-20 мактабни ёпяпсиз», — деб аччиқланган депутат.
Ашимбаеванинг айтишича, унга Соғлиқни сақлаш вазирлигидан мамлакатдаги эпидемиологик вазият ёмонлашгани ҳақида хат келган.
«Ҳозир қўлимда Соғлиқни сақлаш вазирлигидан касалланиш даражаси юқорилиги ҳақида хат бор. Биз барча мактабларни 24 декабргача онлайн ўқитиш форматига ўтказмоқдамиз», — деб жавоб берган у.
Депутат мутасаддилардан бу каби масалаларни ўз вақтида ҳал этишни сўради.
«Бир ҳафта давомида бу масалани ҳал қила олмайсиз. Буни дарҳол ҳал қилиш керак эди. Ўқувчиларни ярми, эҳтимол уларни сиз касалликдан сақлаб қолган бўлардингиз», — деган у.
Бироз аввалроқ ўша йиғилишда Таълим вазирлиги Қирғизистонда бор-йўғи 509 та мактабни ёпгани ҳақида хабар берган эди. 14 декабрь куни муассаса 172 та мактабни ёпган.
ЎРВИ билан касалланиш ва касалхоналарда навбатларнинг кўпайиши
Департамент грипп ва ЎРВИ (Ўткир респиратор вирусли инфекция) билан касалланишнинг кучайиши фонида мактабларни ёпиш тўғрисида қарор қабул қилди. Охирги кунларда Бишкек шифохоналарида катта навбатлар кузатилмоқда.
Республика клиник юқумли касалликлар шифохонаси раҳбари Гулжигит Алиев «Азаттык»қа берган интервьюсида ҳар йили бу вақтда грипп билан боғлиқ вазият ёмонлашаётганини айтган. Аммо бу сафар болалар бутунлай бошқача тарзда касалланмоқда.
Шифокорнинг айтишича, 11-декабрда ушбу шифохонага 300 киши мурожаат қилган, шундан 129 нафари касалхонага ётқизилиб, яна 8 нафар бемор реанимацияга тушган.
«Бизга келаётганларнинг аксарияти кичик болалар. Улар нафас олиш тизимининг ўткир респиратор вирусли касалликлари шикояти билан мурожаат қилишди. Вазият ўтган йилга қараганда ёмонроқ. Баъзиларида нафас олиш қийинлашиб, тана ҳарорати 39-40 даражага кўтарилмоқда. Шу билан бирга, конвульсиялар кузатилмоқда. Биз уларга [касалхонада] жой йўқлигини айта олмаймиз. Шунинг учун, ҳатто коридорларда ҳам қабул қилиш ва жойлаштириш керак. Асосийси, уларни даволашимиз керак», - дейди у.
Умуман олганда Соғлиқни сақлаш вазирлигининг маълумоти бўйича, 5-декабрдан 11-декабрга қадар мамлакатда ўткир респиратор вирусли инфекция ҳамда гриппнинг 14078 ҳолати қайд этилган. Ўтган ҳафта нисбатан беморларнинг сони 1,5 баробарга кўпайган.
Беморларнинг ичидан деярлик 70%и — 14 ёшга қадар болалар.
«Ўткир респиратор вирусли инфекция ҳолатларига беқарор об-ҳаво (совуқ ҳаво) сабаб бўлиши мумкин, бу эса организмнинг ҳимоя кучларининг пасайишига олиб келиб, касалликнинг ривожланишига ёрдам беради. «Шу билан бирга, ўткир респиратор вирусли инфекцияга чалинган катталар вақтини юриш билан ўтказади, санитария-гигиена чораларига риоя этилмаса, уларнинг фарзандлари ва оила аъзоларига касаллик юқиши эҳтимоли юқори», — дейилади вазирлик хабарида.
