Яқинда Жогорку Кенешнинг депутатлари Қирғизистон ва Ўзбекистон ўртасидаги давлат чегарасини делимитация қилиш тўғрисидаги битимни ратификация қилади. Бу ҳақда 11-ноябрда депутат Дастан Бекешев твиттер саҳифасида ёзди. Бироқ депутат ушбу масала бўйича парламент йиғилиши аниқ қачон бўлишини маълум қилмади.
Шартнома парламент томонидан ратификация қилинганидан кейин ҳужжат Президент томонидан имзоланади.
Кампиробод бўйича баҳслар
10 октябрь куни Жогорку Кенешнинг Халқаро ишлар, ҳимоя, хавфсизлик ва миграция қўмитаси ёпиқ йиғилишда «Қирғизистон-Ўзбекистон чегарасининг айрим участкалари тўғрисидаги битим лойиҳаси»ни маъқуллади. Бу ҳужжатга кўра, Қирғизистон Ўзбекистонга Кампиробод сув омборидан 4485 гектар ер беради ва бунинг эвазига бир қанча вилоятлардан 19 минг гектардан ортиқ ер олади.
Президент Садир Жапаров ва Миллий хавфсизлик давлат қўмитаси раҳбари Қамчибек Ташиев бу келишув мамлакат учун фойдали эканини таъкидламоқда.
Бироқ маҳаллий аҳоли, бир қатор фаоллар ва сиёсатчилар бунга қарши бўлиб, айрим маҳаллий аҳоли Кампиробод Ўзбекистонга ўтса, қирғиз халқи учун сув омборига кириш йўли ёпилиб, унинг остидаги унумдор ерлардан фойдалана олмай қолишидан хавотирда.
Депутатлар бир неча ҳафтадан бери Кампирободни Ўзбекистонга ўтказишга рухсат берувчи ҳужжатларни муҳокама қилиб, кўриб чиқишган.
Бу мунозараларнинг барчаси жанжал билан кечмоқда – аввалроқ депутатлар ўз ҳамкасби Чингиз Айдарбековни Халқаро ишлар, мудофаа, хавфсизлик ва миграция қўмитаси раҳбари лавозимидан четлатган эди. У келишув лойиҳасига қарши чиқиб, керакли ҳужжатлар йўқ деган даъво билан қўмита қарорини имзолашдан бош тортган.
Умуман олганда, муҳокама қилинган ҳужжатлар сув омбори жойлашган Ўш вилоятида ҳам, мамлакатнинг икки йирик шаҳри – Бишкек ва Ўшда ҳам бир қанча митинг ва қурултойларга сабаб бўлган.
Расмийлар шунингдек, 30 га яқин одамни тартибсизликларни уюштирганликда айблаб ҳибсга олган. Уларнинг барчаси президент Садир Жапаров ва Қамчибек Ташиевни сув омборини қўшниларга ўтказиб берганини танқид қилишган.
Садир Жапаров сиёсатчилар ва фаолларнинг оммавий ҳибсга олинишини изоҳлар экан, ҳибсга олинганлар Кампиробод масаласига «қизиқмаслигини» айтди. Президентнинг фикрича, улар ҳокимиятга кириш учун сув омбори мавзусини баҳона қилишмоқда.
