2022-йил 1-октябрдан ҳарбий ва ҳуқуқни муҳофаза қилувчи органлар ходимларининг хизмат учун устама ҳақлари миқдори оширилади. Тегишли фармонни Садир Жапаров имзолади.
Ҳужжатга кўра, устама йиллик иш ҳақи фондининг 80 фоизигача оширилади. Фармон прокуратура органларига тааллуқли эмас.
Президент маъмурияти мазкур фармон ҳарбий хизматчилар ва ҳуқуқни муҳофаза қилувчи органлар ходимларининг моддий аҳволини яхшилаш ва уларнинг хизмат вазифаларини бажариши учун зарур шарт-шароитларни таъминлаш мақсадида имзоланганини алоҳида таъкидлади.
Чегарачилар учун хонадонлар
11-сентябрь куни Садир Жапаров Миллий хавфсизлик қўмитаси Чегара хизмати ходимларига янги хонадонлар калитини топширди.
Президент 36 нафар чегарачи оиласи учун уй-жой қуриш учун давлат бюджетидан 100 миллион сом ажратилганини таъкидлади.
У Боткен вилоятида жойлашган ҳарбий қисмларда хизмат қилаётган ҳарбий хизматчиларнинг ойлик маошини ошириш режалаштирилаётганини айтган.
МХДҚ ходимлари учун квартиралар ва янги бинолар
2022-йил август ойида Садир Жапаров Бишкекда Миллий хавфсизлик давлат қўмитаси ходимларига янги хонадонлар калитини топширган эди. Матбуот хизматининг хабар беришича, уй-жой 306 оилага мўлжалланган. У атиги 1,5 йил ичида қурилган. Бир квадрат метрнинг нархи 300 АҚШ долларини ташкил этди.
2022-йил сентябрь ойида Давлат харидлари порталида Талас шаҳрида МХДҚ ходимлари учун кўп қаватли уйлар қуриш бўйича тендер эълон қилинган эди. Портал маълумотларига кўра, режалаштирилган маблағ - 91 миллион 378 минг сомни ташкил этади. Танловга аризалар топширишнинг охирги муддати - 30-сентябргача. Техник спецификацияда уй беш қаватли бўлади, тўлиқ тайёр ҳолда етказиб берилиши айтилган.
МХДҚ ходимлари учун турар жойлардан ташқари хизмат бинолари ҳам қурилмоқда. 2022-йил сентябрь ойида махсус хизмат раҳбари Камчибек Ташиев маҳкама ходимлари учун 50 га яқин янги бино қурилганини маълум қилган.
