Чегарадаги қуролли тўқнашув: Олти бола операция қилинди, энг кичиги тўққиз ойлик

237

Саккиз киши Она ва болаликни муҳофаза қилиш миллий марказида даволанмоқда. Уларнинг бари Тожикистон билан чегарадаги қуролли тўқнашувда жабрланган. Бу ҳақда «Клооп»га  марказ директори Гулзат Маймерова маълум қилди.

Унинг сўзларига кўра, жабрланганлар саккиз кишининг олти нафари болалардир.

«Энг кичиги тўққиз ойлик, энг каттаси 11 ёшда. Барча беморлар операция қилинди. Бугунги кунда улар нисбатан яхши ҳолатда. Улар билан психолог ишлайди», - дейди Маймерова.

Марказ раҳбари тўрт нафар бола ва икки нафар катта ёшли киши бир оиланинг аъзоси эканини таъкидлади.

Қуролли можаро

16-сентябрь куни эрталаб Боткен вилоятида қирғиз-тожик чегарасида қуролли тўқнашув авж олди. Чегарадаги илк тўқнашувлар 14-сентябрь куни содир бўлган.

Қирғизистон Чегара хизмати маълумотларига кўра, икки давлат чегарасининг бутун периметри бўйлаб шиддатли тўқнашувлар давом этмоқда. Икки давлат расмийлари бир-бирини қуролли можаро бошлаганликда айблади.

Қирғизистон расмийлари 16-сентябрь куни тўқнашувлар натижасида 15 ёшли қиз ўқ жароҳатидан вафот этганини маълум қилди.

Соғлиқни сақлаш вазирлиги маълумотларига кўра, можаро оқибатида 24 нафар қирғизистонлик ҳалок бўлган. Департамент, шунингдек, 103 киши жароҳатланганини айтди.

Фавқулодда вазиятлар вазирлигининг дастлабки маълумотларига кўра, соат 21:00 да тўқнашувлардан 136 мингдан ортиқ киши хавфсиз жойга эвакуация қилинган.

17-сентябрь куни эрталаб қирғиз-тожик чегарасида вазият таранглигича қолмоқда. Тожикистон томони эрталаб икки марта аҳоли пунктларини миномётдан ўққа тутган.

Тожик томони эрталабки 8:50 да аввалроқ тузилган келишувларга қарамай, Боткен вилоятидаги Паски-Ариқ аҳоли пунктини миномётлардан ўққа тутган. Соат 11:15да эса Дўстуқ қишлоғи ўққа тутилди.

Муаллиф: Медина Купсулдаева