Энергетика вазири Таалайбек Ибраев «Биринчи Радио»даги жонли эфирда Бишкекда келаётган қишни смогсиз ўтказиш мумкинлигини тахмин қилди.
Унинг сўзларига кўра, Қирғизистон ҳукуматлари бу борада катта иш олиб бормоқда.
«[Бишкек] шаҳар ҳокимияти кир ювишхоналар ва чиқинди матолар, резина ва бошқа нарсаларни ёқадиган жойларни аниқлади. Шунингдек, қазонхоналар газга ўтказилмоқда. Газпромимиз ҳам газлаштиришни амалга оширяпти, уларнинг хизматларига ўз миннатдорчилигимизни билдиришимиз керак», — деди Ибраев.
Вазир шунингдек, шаҳарда газда ишлайдиган автобуслар ҳаракатланаётганини қайд этди.
«Сиз кўрганингиздек, дизелда ишлайдиган автобусларни олиб ташлаганимиздан кейин ҳаво тозаланиб қолди», — деб таъкидлади у.
Бундан ташқари, Ибраев Бишкек ИЭМни капитал таъмирлаш учун бюджетдан пул ажратилганини маълум қилди. Ҳавони ифлосланишини камайтириш учун у ерга янги фильтрлар ўрнатилади.
«ИЭМда реконструкция ва капитал таъмирлаш ишларини олиб бормоқдамиз. Яна реконструкция қилинган уч-тўрт блок ва фильтрлар алмаштирилганидан кейин экологлар ва журналистларни таклиф қиламиз... Бу йил, худо хоҳласа, қишни смогсиз ўтказамиз», — деди энергетика вазири.
Ибраевнинг айтишича, ИЭМдаги тегишли ишлар Осиё тараққиёт банки экологлари тайёрлаган тадқиқот асосида олиб борилмоқда.
