Ўш областидаги Қорасув райони мактабларининг юқори синфдаги ўқувчилари муштлашгани учун қўлга олинди. Воқеадан кейин болалардан бири пичоқдан олган жароҳатлари билан касалхонага ётқизилган. Милициянинг фарази бўйича, можаронинг сабаби — жабрланган боланинг камситилиши.
Муштлашув 22-ноябрга ўтар кечаси Ўш областидаги Қорасув районида бўлган. Ўш ИИБнинг матбуот котиби Женишбек Аширбаев тергов давомида 10-11-синфнинг 31 ўқувчиси қўлга олинганини «Клооп»га айтди. Уларга тушунтириш ишлари ўтказилиб, қўйиб юборилган.
Аширбаевнинг айтишича, муштлашув вақтида 16 ёшдаги болани номаълум кишилар ўткир буюм билан ярадор қилишган. Воқеадан кейин у район касалхонасига ётқизилган.
«Болаларнинг йиғила бошлаганини кўрганлар милицияга хабар беришган. Тартиб посбонлари келганда муштлашув иштирокчилари турли томонларга қочиб, улардан бири номаълум ўткир буюм билан жабрланувчининг бўйнини, қўл-оёқларини тилиб юборган», — деди Аширбаев.
Муштлашув Қорасув районидаги Сарай ҳамда Жоош қишлоқ ҳукуматида яшаган икки боланинг уришишидан чиққанини Ўш ИИБнинг матбуот котиби тушинтирди. Аширбаевнинг айтишича, низонинг чиқишигақўшни қишлоқнинг болалари жабрланувчини камситгани сабаб бўлган.
«Бу икки бола ўзларининг дўстларини чақириб, ўртада болаларнинг тўпи йиғилиб қолган. Ҳозирда жабрланувчининг жароҳатини аниқлаш мақсадида суд-тиббий экспертиза тайинланди. Унинг натижаси билан жиноят иши қўзғалиб-қўзғалмаслиги маълум бўлади», — деди у.
Қорасув район касалхонасининг директори Гулкайир Муратова касалхонага ётқизилган мактаб ўқувчиси 10 карра пичоқ еганини ва унинг аҳволини барқарор деб баҳолаганинини «Клооп»нинг журналистига айтди.
«Жароҳатланган болани тунги соат бирларда олиб кетишди, уни травматология бўлимига ётқиздик. Ўн ери пичоқдан жароҳатланган — кўпи соннинг орқа қисмида. Бош ва қўлида ҳам жароҳатлар бор. Бола ҳозир ўзи оёқда юрибди», — деди Муратова.
Жабрланган 16 ёшдаги Нурдоолотнинг отаси болалар нима учун тортишиб кетишганини билмаслигини айтади. Унинг айтишича, боласи «уришқоқ» эмас.
«Ўша куни ишдан келиб, иккимиз бирга овқатланганмиз. 3-4 минутга деб чиқиб кетди. [...] Биз уни касалхонага олиб борганда аҳволи жуда ёмон эди, кўп қон кетиб, қон босими тушиб кетган эди. Ўша куниёқ ариза ёзганман, аниқроқ айтганда милициядагилар ёзиб берганига қўл қўйиб бердим», — деди Нурлан Асанов «Клооп»нинг журналистига.
Бу Ўш областидаги биринчи ҳолат эмас — 2017 йили Аравон районидаги шу каби воқеада 9-11-синфнинг ўқувчилари баскетбол ўйинидан кейин жанжаллашиб кетган. Маҳаллий ОАВларнинг маълумотига кўра, фикр келишмовчилик пичоқвозликка етган — бир ўқувчи пичоқдан бўйнига жароҳат олиб касалхонага тушган. Ундан ташқари, яна уч ўқувчи жабрланиб, милиция бу воқеа бўйича тўрт ўсмирни қўлга олган.
Муҳаррирлар: Айсимбат Токоева, Гүлжан Эшбаева
